ကျွမ်းကျင်သူတို့၏ ထင်မြင်ချက်များ။

အခြားနိုင်ငံ၏ ဥပဒေအချက်တစ်ခုနှင့်စပ်လျဉ်း၍ဖြစ်စေ၊ သိပ္ပံပညာ သို့မဟုတ် ဝိဇ္ဇာပညာဆိုင်ရာ အချက်တစ်ခုနှင့်စပ်လျဉ်း၍ဖြစ်စေ၊ လက်ရေးလက်သား သို့မဟုတ် လက်ဗွေပုံစံတူ မတူနှင့်စပ်လျဉ်း၍ဖြစ်စေ တရားရုံးက ဆင်ခြင်သုံးသပ်ရန်ရှိသည့်အခါ အဆိုပါအခြားနိုင်ငံ၏ဥပဒေ၊ သိပ္ပံပညာ၊ သို့မဟုတ် ဝိဇ္ဇာပညာရပ်တွင်ဖြစ်စေ လက်ရေးလက်သား သို့မဟုတ် လက်ဗွေပုံစံတူ မတူနှိုင်းယှဉ်စိစစ်ရာတွင်ဖြစ်စေ ကျွမ်းကျင်တတ်မြောက်သူတို့က ဆိုခဲ့သည့် အကြောင်းခြင်းရာနှင့် စပ်လျဉ်း၍ ပေးသောထင်မြင် ချက်များသည် အမှု၌စပ်ဆိုင်သောအကြောင်းခြင်းရာများဖြစ်သည်။

အဆိုပါ ပုဂ္ဂိုလ်များကိုကျွမ်းကျင်သူများဟုခေါ်သည်။

ဥပမာများ

(က) ပြဿနာမှာ A သည် အဆိပ်ကြောင့်သေဆုံးရခြင်းဟုတ်မဟုတ် ဖြစ်သည်။

A စား၍သေဆုံးသည်ဆိုသောအဆိပ်ကြောင့် ပေါ်ပေါက်လာတတ်သော လက္ခဏာများနှင့်စပ်လျဉ်း၍ ကျွမ်းကျင်သူတို့၏ထင်မြင်ချက်များသည်စပ်ဆိုင်သည်။

(ခ) ပြဿနာမှာ A သည်တစ်စုံတစ်ခုသောပြုလုပ်မှုကိုပြုစဉ်အခါက စိတ်ပေါ့သွပ်ခြင်းကြောင့် ထိုပြုလုပ် မှုသည် မည်သို့သောသဘောရှိသည်ကိုသော်လည်းကောင်း၊ မိမိသည်မှားယွင်းသောသို့မဟုတ် တရား ဥပဒေနှင့် ဆန့်ကျင်သောအမှုကိုပြုလျက်ရှိသည်ကိုသော်လည်းကောင်း၊ သိနိုင်စွမ်းရှိမရှိဖြစ်သည်။

A ၌ တွေ့ရှိရသော လက္ခဏာများသည် ဖြစ်ရိုးဖြစ်စဉ်အားဖြင့် စိတ်ပေါ့သွပ်ခြင်း၏လက္ခဏာများ ဟုတ် မဟုတ်နှင့် ထိုသို့စိတ်ပေါ့သွပ်သူတို့သည် စိတ်ပေါ့သွပ်ခြင်းကြောင့်၊ မိမိတို့၏ပြုလုပ်မှုများသည်မည်သို့ သောသဘောရှိသည်ကိုသော်လည်းကောင်း၊ မိမိတို့၏ပြုလုပ်ချက်သည် မှားယွင်းသည် သို့မဟုတ် တရားဥပဒေနှင့် ဆန့်ကျင်သည်ကိုသော်လည်းကောင်း သိနိုင်စွမ်းမရှိသည့်အဖြစ်သို့ရောက်မြဲ ဟုတ်မဟုတ်ဆိုသည့်ပြဿနာနှင့် စပ်လျဉ်း၍ ကျွမ်းကျင်သူတို့၏ ထင်မြင်ချက်များသည်စပ်ဆိုင်သည်။

(ဂ) ပြဿနာမှာ စာတမ်းအမှတ်အသားတစ်ခုကို A က ရေးမရေးဖြစ်သည်။

A ရေးကြောင်း သက်သေထင်ရှားတင်ပြပြီးဖြစ်သော သို့မဟုတ် ဝန်ခံပြီးဖြစ်သော အခြားစာတမ်း အမှတ်အသားတစ်ခုကို တင်ပြထားသည်။

ထိုစာတမ်းအမှတ်အသားနှစ်ခုကို တစ်ဦးတည်းကရေးသားသည်သို့မဟုတ်တစ်ဦးစီကရေးသားသည် ဆိုသောပြဿနာနှင့်စပ်လျဉ်း၍ ကျွမ်းကျင်သူတို့၏ ထင်မြင်ချက်များသည် စပ်ဆိုင်သည်။