ရှင်းလင်းချက်။ လှုံ့ဆော်ခြင်းကြောင့်ဖြစ်စေ၊ ပူးပေါင်းကြံစည်ခြင်းကြောင့်ဖြစ်စေ အားပေး ကူညီမှု ဖြစ်မြောက်အောင် ကူပံ့ခြင်းကြောင့်ဖြစ်စေ ပြုလုပ်မှုသော်လည်းကောင်း၊ ပြစ်မှုသော်လည်းကောင်း ဖြစ်မြောက်ခဲ့လျှင် ထိုပြုလုပ်မှုသည် သို့မဟုတ် ထိုပြစ်မှုသည် အားပေးကူညီခြင်းကြောင့် ဖြစ်မြောက်သည် မည်၏။

ဥပမာများ

(က) ပြည်သူ့ဝန်ထမ်း B သည် ရာထူးအလျောက် အလုပ်ဝတ္တရားများကို ဆောင်ရွက်ရာတွင် B က မိမိအား အခွင့်အရေးပေးရန် A က B သို့ လာဘ်ပေးသည်ကို B လက်ခံ၏။ B မှာ ပုဒ်မ ၁၆၁ တွင် အဓိပ္ပာယ် ဖော်ပြထားသည့်ပြစ်မှုကို အားပေးကူညီရာရောက်သည်။

(ခ) မမှန်သက်သေခံရန် A က B ကို လှုံ့ဆော်၏။ ထိုသို့လှုံ့ဆော်သည့်အတိုင်း B က မမှန်သက်သေခံမှုကို ကျူးလွန်၏။ မမှန်သက်သေခံရန် အားပေးကူညီမှုကို A ကျူးလွန်သည်ဖြစ်၍ B နှင့်ထပ်တူ ပြစ်ဒဏ် ချမှတ်ခြင်းခံထိုက်သည်။

(ဂ) A နှင့် B တို့သည် Z ကိုအဆိပ်ဖြင့်သတ်ရန် ပူးပေါင်းကြံစည်ကြ၏။ ထိုသို့ ပူးပေါင်းကြံစည်သည့် အတိုင်း A က အဆိပ်ကိုရရှိ၍ Z ကို အဆိပ်ခတ်ရန် B အား ပေးသဖြင့် B က ပူးပေါင်းကြံစည်ခဲ့သည့်အတိုင်း A ၏ မျက်ကွယ်တွင် Z ကို အဆိပ်ခတ်သောကြောင့် Z သေဆုံး၏။ B မှာ လူသတ်မှုအတွက် ပြစ်ဒဏ် ထိုက်သင့်သည်။ A မှာ B နှင့် ပူးပေါင်းကြံစည်သောကြောင့် ထိုပြစ်မှုကို အားပေးကူညီသည့် ပြစ်ဒဏ် ထိုက်သင့်၍ လူသတ်မှုအတွက် ပြစ်ဒဏ်ချမှတ်ခြင်း ခံထိုက်သည်။