မည်သူမဆို ကျမ်းသစ္စာကျိန်ဆိုချက်အရဖြစ်စေ၊ ဥပဒေ၌ အတိအလင်းဖော်ပြထားသော ပြဋ္ဌာန်းချက်အရဖြစ်စေ အမှန်ထွက်ဆိုရန် ဥပဒေအရ တာဝန်ရှိပါလျက်နှင့် သို့မဟုတ် အကြောင်းအရာ တစ်ခုခုနှင့် စပ်လျဉ်း၍ ကြေညာချက်ပြုရန် ဥပဒေအရ တာဝန်ရှိလျက်နှင့် မမှန်သည်လည်းဖြစ်သည့်ပြင် မမှန်ဟု မိမိသိသည်လည်း ဖြစ်သော သို့မဟုတ် ယုံကြည်သည်လည်းဖြစ်သော သို့မဟုတ် မှန်သည်ဟု မိမိ ယုံကြည်ခြင်း မရှိသည်လည်းဖြစ်သော ဖော်ပြချက်ကိုပြုလျှင် ထိုသူသည် မမှန်သက်သေခံသည်မည်၏။

ရှင်းလင်းချက် ၁ နှုတ်ဖြင့်ဖြစ်စေ၊ အခြားနည်းဖြင့်ဖြစ်စေ ပြုသောဖော်ပြချက်သည် ဤပုဒ်မ၏ အဓိပ္ပာယ်၌အကျုံးဝင်သည်။

ရှင်းလင်းချက် ၂ ထွက်ဆိုသူ၏ သို့မဟုတ် ကြေညာသူ၏ ယုံကြည်ချက်နှင့်စပ်လျဉ်း၍ ထိုသူ၏ ယုံကြည်ချက်အတိုင်း မဟုတ်သော ကြေညာချက်သည် သို့မဟုတ် ထွက်ဆို ချက်သည် ဤပုဒ်မ၏ အဓိပ္ပာယ်၌ အကျူံးဝင်သည်။ ထို့ပြင် သူတစ်ဦးသည် မိမိမသိသော အရာကိုသိသည်ဟု ထွက်ဆိုခြင်းဖြင့် မမှန်သက်သေခံမှု ကျူးလွန်ရာရောက်သည့်နည်းတူ မိမိမယုံကြည်သော အရာကို ယုံကြည်သည် ဟု ထွက်ဆိုခြင်းဖြင့်လည်း မမှန်သက်သေခံမှု ကျူးလွန်ရာရောက်သည်။

ဥပမာများ

(က) Z ထံမှ တရားသဖြင့် ရရန်ရှိသော ကြွေးငွေတစ်ထောင်အတွက် B က တရား စွဲဆိုရာတွင် B ၏ တောင်းဆိုချက်အတိုင်း မှန်သည်ဟု Z က ဝန်ခံသည်ကို မိမိကြားကြောင်း A က အမှုစစ်ဆေးစဉ်တွင် ကျမ်းကျိန်၍မမှန်ထွက်ဆို၏။ A သည် မမှန်သက်သေခံသည်မည်၏။

(ခ) အမှန်ထွက်ဆိုပါမည်ဟု ကျမ်းသစ္စာပြုပြီးသော A သည် ရေးထိုးသော လက်မှတ်တစ်ခုကို Z ၏ လက်မှတ်ဖြစ်သည်ဟု မိမိမယုံကြည်ပါဘဲလျက် Z ၏ လက်မှတ်ဖြစ်သည်ဟု ယုံကြည်ကြောင်း ထွက်ဆို၏။ ဤနေရာတွင် Aသည် မိမိယုံကြည်သည့်အတိုင်း ထွက်ဆိုခြင်း မဟုတ်သည်ကို သိလျက်နှင့် ထွက်ဆိုခြင်းဖြစ်သည်။ ထို့ကြောင့် A သည် မမှန်သက်သေခံသည် မည်၏။

(ဂ) A သည် Z ရေးသားမြဲလက်ရေး၏ ပုံပန်းကို သိသဖြင့် ရေးထိုးသော လက်မှတ်တစ်ခုကို Z ၏ လက်မှတ်ဖြစ်သည်ဟု သဘောရိုးဖြင့် ယုံကြည်သည့်အတိုင်း Z ၏ လက်မှတ်ဖြစ်သည်ဟု မိမိ ယုံကြည်ကြောင်း ထွက်ဆို၏။ A ၏ ထွက်ဆိုချက်သည် သူ၏ ယုံကြည်ချက်နှင့်သာ သက်ဆိုင်သည့်ပြင် သူအမှန်တကယ်ယုံကြည်သည်လည်းဖြစ်၏။ ထို့ကြောင့် အဆိုပါ ရေးထိုးထားသော လက်မှတ်သည် Z ၏ လက်မှတ်မဟုတ်စေကာမူ A သည် မမှန်သက်သေခံသည်မမည်။

(ဃ) အမှန်ထွက်ဆိုပါမည်ဟု ကျမ်းသစ္စာပြုပြီးသော A သည် ဤမည်သော နေ့ရက်တွင် ဤမည်သောနေရာ၌ Z ရှိကြောင်း မသိပါဘဲလျက် ထိုနေ့ရက်၊ ထိုနေရာ၌ Z ရှိကြောင်း မိမိသိသည်ဟု ထွက်ဆို၏။ Z သည် ထိုနေ့ရက်၊ ထိုနေရာ၌ ရှိသည်ဖြစ်စေ၊ မရှိသည်ဖြစ်စေ A သည် မမှန် သက်သေခံသည်မည်၏။

(င) စကားပြန်ဖြစ်သူ သို့မဟုတ် ဘာသာပြန်ဖြစ်သူ A သည် ထွက်ဆိုချက်တစ်ခုကို သော်လည်းကောင်း၊ စာတမ်းအမှတ်အသား တစ်ခုကိုသော်လည်းကောင်း မှန်ကန်စွာ ဘာသာပြန်ဆို ပါမည်ဟု ကျမ်းသစ္စာ ပြုထားပါလျက်နှင့် မမှန်သည်လည်းဖြစ်သည့်ပြင် မှန်သည်ဟု မိမိယုံကြည်ခြင်း မရှိသည်လည်းဖြစ်သော ဘာသာပြန်ဆိုချက်ကိုပြု၏ သို့မဟုတ် မှန်သည်ဟု တာဝန်ခံ၏။ A သည် မမှန်သက်သေခံသည်မည်၏။