မည်သူမဆို ပြည်သူ့ဝန်ထမ်းအဖြစ်ဖြင့် ပြစ်မှုတစ်ခုကို တားဆီးရန် တာဝန်ဝတ္တရားရှိသော ပြည်သူ့ ဝန်ထမ်းသည် ထိုပြစ်မှုကျူးလွန်ခြင်းကို လွယ်ကူစေရန် ကြံရွယ်၍သော်လည်းကောင်း၊ လွယ်ကူအောင် မိမိက ဖြစ်စေတန်ရာသည်ကို သိလျက်နှင့်သော်လည်းကောင်း ထိုပြစ်မှုကို ကျူးလွန်ရန် စီစဉ်ချက်ရှိ ကြောင်းကို မိမိအလိုအလျောက် ပြုလုပ်မှုဖြင့်ဖြစ်စေ၊ ဥပဒေနှင့်ဆန့်ကျင်သော ပျက်ကွက်မှု ပြုခြင်းဖြင့် ဖြစ်စေ ထိမ်ချန်လျှင် သို့မဟုတ် ထိုစီစဉ်ချက်နှင့်စပ်လျဉ်း၍ မမှန်သည်ကို သိလျက်နှင့် မှန်သည့်အနေဖြင့် မိမိအလိုအလျောက်ဖော်ပြလျှင် ထိုပြည်သူ့ ဝန်ထမ်းကို−

သေဒဏ်အစရှိသော ပြစ်ဒဏ်ထိုက်သင့်သည့် ပြစ်မှုဖြစ်လျှင်။

အဆိုပါ ပြစ်မှုကျူးလွန်ခြင်းရှိပါက ကျူးလွန်သောပြစ်မှုအတွက် ပြဋ္ဌာန်းထားသည့် အများဆုံး ထောင်ဒဏ် တစ်မျိုးမျိုး၏ ထက်ဝက်ထိဖြစ်စေ၊ ထိုပြစ်မှုအတွက် ပြဋ္ဌာန်းထားသည့် ငွေဒဏ်ဖြစ်စေ၊ ဒဏ်နှစ်ရပ်လုံး ဖြစ်စေ ချမှတ်ရမည်။

သို့မဟုတ် အဆိုပါ ပြစ်မှုမျိုးမှာ သေဒဏ်ဖြစ်စေ၊ ထောင်ဒဏ်နှစ် နှစ်ဆယ်ဖြစ်စေ ထိုက်သင့်သော ပြစ်မှုမျိုးဖြစ်လျှင် ဆယ်နှစ်ထိထောင်ဒဏ်တစ်မျိုးမျိုး ချမှတ်ရမည်။

ပြစ်မှုကျူးလွန်ခြင်းမရှိခဲ့လျှင်။

သို့မဟုတ် အဆိုပါ ပြစ်မှုကျူးလွန်ခြင်းမရှိပါက သက်ဆိုင်ရာပြစ်မှုအတွက် ပြဋ္ဌာန်းထားသည့် အများဆုံး ထောင်ဒဏ်တစ်မျိုးမျိုး၏ လေးပုံတစ်ပုံထိဖြစ်စေ၊ ထိုပြစ်မှုအတွက် ပြဋ္ဌာန်းထားသည့် ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်။

ဥပမာ

လုယက်မှုစီစဉ်ချက်နှင့်စပ်လျဉ်း၍ မိမိရရှိသော သတင်းကိုတိုင်ကြားရန် ဥပဒေအရ တာဝန် ဝတ္တရား ရှိသော ရဲအရာရှိ A သည် ပြစ်မှုကျူးလွန်ခြင်းကိုလွယ်ကူစေရန် ကြံရွယ်ချက်ဖြင့် B လုယက်မှုကျူးလွန်ရန် စီစဉ်ချက်ရှိသည်ကိုသိလျက်နှင့် တိုင်ကြားရန် ပျက်ကွက်၏။ ထိုသို့ ပျက်ကွက်ခြင်းသည် ဥပဒေနှင့် ဆန့်ကျင်သောပျက်ကွက်မှု ပြုခြင်းဖြစ်သောကြောင့် A သည် ဤပုဒ်မပါ ပြဋ္ဌာန်းချက်နှင့်အညီ ပြစ်ဒဏ် ချမှတ်ခြင်း ခံထိုက်သည်။