ရှေ့နေတစ်ဦးသည်မိမိ၏အမှုသည်က အတိအလင်းသဘောတူညီခြင်းမရှိလျှင် ထိုအမှုသည်၏ ရှေ့နေအဖြစ် ဆောင်ရွက်နိုင်ရန်အလို့ငှာ ထိုသို့ဆောင်ရွက်နေစဉ်အတွင်း သိရှိထားသည့် မိမိအားအမှု သည်ကဖြစ်စေ၊ အမှုသည်အတွက်တစ်ဦးဦးကဖြစ်စေ ပြောဆိုရေးသားချက် သို့မဟုတ်မိမိသိရှိခွင့်ရခဲ့ သည့် စာချုပ်စာတမ်းတစ်ခုခုတွင် ပါရှိသောအချက်များ သို့မဟုတ် စာချုပ်စာတမ်း၏အခြေအနေ သို့မဟုတ် မိမိ၏အမှုသည်များအား မိမိပေးခဲ့သော အကြံဉာဏ်မည်သည့်အခါမျှ ထုတ်ဖော်ပြောဆိုခွင့် မရှိစေရ။
သို့ရာတွင် ဤပုဒ်မပါပြဋ္ဌာန်းချက်ကိုအကာအကွယ်ယူ၍ အောက်ပါအချက်တို့ကိုထုတ်ဖော်ပြောဆိုခြင်း မပြုဘဲ နေခွင့်မရှိစေရ-
(၁) တရားဥပဒေနှင့် မညီသော အကြံအစည်တစ်ခုခုဖြစ်မြောက်စေရန်အလို့ငှာပြောဆိုရေးသားချက်တစ် ရပ်ရပ်၊
(၂) အမှုသည်၏ရှေ့နေအဖြစ်ဆောင်ရွက်နေစဉ်အတွင်း မိမိတွေ့ရှိရသည့်အချက်တစ်ခုခုအရပြစ်မှု သို့မဟုတ် လိမ်လည်မှုတစ်ခုခုကိုထိုအမှုသည်၏ရှေ့နေအဖြစ်သို့ဆောင်ရွက်ခြင်း စတင်ပြီးနောက်တွင်ကျူးလွန်ထားကြောင်းပေါ်လွင်လျှင်ထိုသို့တွေ့ရှိသောအချက်။
ရှေ့နေက သိရှိထားသည်ဆိုရာ၌အမှုသည် သို့မဟုတ် ယင်း၏ကိုယ်စား ဆောင်ရွက်သူနှင့်ဆက်သွယ်ရာ ၌ သိရှိရသောအကြောင်းခြင်းရာအားလုံးအကျုံးဝင်သည်။ အမှုသည်ကိုယ်တိုင်ဖြစ်စေ၊ ယင်း၏ကိုယ်စား ဖြစ်စေ အတိအလင်းသော်လည်းကောင်း၊ အခြားနည်းဖြင့် သော်လည်းကောင်းသိရှိရသောအကြောင်း ခြင်းရာအားလုံးကိုဆိုလိုသည်။
ရှင်းလင်းချက်။ ။ ဤပုဒ်မတွင်ဖော်ပြထားသော ဆောင်ရွက်ရန်တာဝန်မှာသက်ဆိုင်ရာအမှုတွင် ရှေ့နေ အဖြစ်ဆောင်ရွက်ခြင်းပြီးဆုံးသော်လည်း ဆက်လက်တည်ရှိသည်။
ဥပမာများ
(က) အမှုသည် A ကရှေ့နေ B အား “ကျွန်တော်လိမ်လည်အတုပြုမှုကို ကျူးလွန်ခဲ့၍ကျွန်တော့်အတွက် ခုခံချေပပေးပါ” ဟုပြောသည်။
ပြစ်မှုကျူးလွန်ကြောင်းထင်ရှားသူအတွက် ခုခံချေပပေးခြင်းသည်ပြစ်မှုမကင်းသည့် အကြံအစည် မဟုတ်သောကြောင့် ထိုပြောဆိုချက်ကိုရှေ့နေကထုတ်ဖော်ပြောဆိုခွင့်မရှိ။
(ခ) အမှုသည် A က ရှေ့နေ B အား “ကျွန်တော်၏လိမ်လည်အတုပြုလုပ်ထားသည့်စာချုပ်ဖြင့် ပစ္စည်း ကိုရယူလိုပါသည်။ ထိုစာချုပ်ဖြင့်တရားစွဲဆိုပေးပါ” ဟုပြောဆိုသည်။
ထိုပြောဆိုချက်မှာ ပြစ်မှုမကင်းသည့်အကြံအစည် ဖြစ်မြောက်ရေးအတွက် ပြောဆိုချက်ဖြစ်၍ရှေ့နေက မထုတ်ဖော် မပြောဆိုဘဲ နေခွင့်မရှိ။
(ဂ) A သည် အလွဲသုံးစားမှုဖြင့် တရားစွဲဆိုခြင်းခံရသဖြင့် မိမိအားခုခံပေးရန် ရှေ့နေ B ကို ငှားရမ်းသည်။ B သည် အမှုကိုလိုက်ပါဆောင်ရွက်နေစဉ်အတွင်း A ၏စာရင်းစာအုပ်တွင် အလွဲသုံးစား ထားသည်ဆိုသော ငွေနှင့်စပ်လျဉ်း၍မိမိအားငှားရမ်းစအချိန်က မတွေ့ရှိခဲ့သော ရေးသွင်းချက်ကို ထိုစာရင်းစာအုပ်တွင် တွေ့မြင်ရသည်။
ထိုကဲ့သို့ B တွေ့မြင်ရသည့် အကြောင်းခြင်းရာမှာမိမိရှေ့နေအဖြစ်လိုက်ပါဆောင်ရွက်နေစဉ်အတွင်း သိရှိရသောအကြောင်းခြင်းရာဖြစ်ပြီး အမှုစတင်ဆောင်ရွက်သည့်နောက်မှ လိမ်လည်လှည့်ဖြားမှုကျူး လွန်ထားကြောင်း ထိုအကြောင်းခြင်းရာပေါ်လွင်သဖြင့် B သည် ထိုအကြောင်းခြင်းရာကို မထုတ် ဖော်မပြောဆိုဘဲနေခွင့်မရှိ။